वन शिक्षण..जन शिक्षण

                         

                           

२०११ वर्ष नुकतेच सुरू झालंय त्यासाठी आमच्या सर्व ब्लॉगर मित्र-मंडळीना शुभेच्छा. हे २०११ साल 'आंतरराष्ट्रीय वन वर्ष' म्हणून युनेस्कोने जाहीर केलंय. त्याच निमित्ताने एलआयसीने यावर्षी काढलेल्या एका अतिशय सुंदर कॅलेंडरमधले आपल्या देशातल्या १२ राष्ट्रीय अभयारण्यांचे अप्रतिम फोटो माझ्यातल्या निसर्गाप्रेमीला खुणावतायत. हे पाहून मन सारखं जंगलाकडे धाव घेऊ पाहतंय. मागल्या वर्षी मध्याप्रदेशमधले बांधवगढ आणि कर्नाटकातले नागरहोले नैशनल पार्क पायाखालून घातलंय. तसे त्याआधी उत्तरांचलचे जिम कॉर्बेट नैशनलपार्क देखील पाहून झालंय. पण अशा जंगलांमध्ये कितीही वेळा गेले तरी न भरणारे हे मन आणि न थकणारी हि पावले आहेत तोपर्यंत अश्या रानबुलाव्याना मन साद देतच राहणार. भारतामध्ये काही ठिकाणी वनांची आणि त्यामधल्या वन्यजीवांची सध्या काय विदारक अवस्था आहे हे सांगायला केवळ जयराम रमेश पुरे पडणार नाहीयेत तर त्यासाठी आज वन आणि वन्यजीव संरक्षणविषयक जागृतीची आणि सरकारी प्रयत्नांची खरे तर सर्वात जास्त गरज आहे. आजमितीला देशातल्या कित्येक जंगलांमध्ये कितीतरी वनरक्षकांची पदे अपुरे पगार आणि योग्य त्या सोयी मिळत नसल्यामुळे रिक्त आहेत. अशा काही त्रुटींची सरकारकडून दाखल घेतली गेली पाहिजे. कारण केवळ जनजागृती करून वने वाचणार नाहीयेत त्यासाठी सबळ कायद्यांची आणि अधिकाधिक सरकारी ( कागदावर न पडून राहण्याऱ्या ) योजनांची गरज आहे. असो, आपण सर्व प्रयत्न करत राहू आणि देशातल्या, राज्यातल्या निसर्ग,वन संवर्धनाला हातभार लावू यात. happy forest year 2011 :) save forests! save earth !